Julio Sotok Nafarroako Bertsolari Txapelketa bigarren aldiz irabazi du, apirilaren 9an Iruñean egin den finalean. Saio ederra egin zuten taulara igo diren zortzi bertsolariek, eta Labriten egon zen giro ederrak lagunduta, bertsolaritzaren festa handia izan zen larunbatekoa. Izan ere, 1.300 bertsozalek lepo bete zuten hiriburuko pilota plaza.
Finala estu joan da eta buruz burukoan erabaki zen. Julio Sotoren eta Xabier Silveiraren arteko aldea txikia zenez, buruz buruko bi ariketa egin behar izan zituzten. Azkenean, Sotok lortu zuen puntuaziorik altuena, lau puntu t´erdi kendu zizkion Silveirari. Hirugarren postua Estitxu Arozena lesakarrarentzat izan da, laugarrena Jon Barberena elizondarrarentzat, bosgarrena Julen Zelaieta beratarrarentzat, seigarrena Xabier Terreros lesakarrarentzat, zazpigarrena Eneko Lazkozentzat eta zortzigarrena Oskar Estangarentzat.
Manolo Arozenak Nafarroako Bertsozale Elkarteko lehendakari ohiak jantzi zion txapela Sotori. Gainera, txapelketa hau ziklo baten amaiera ere izan dela aipatu eta heldu den urtetik aitzinera txapelketa bertze formato batean eginen dela ere iragarri zuen Arozenak.
Azken agurrean txapeldunak sufritzen ari diren guztiei eskaini zien txapela.
Etxetik urrun ziega batean
alaba daukan aitari,
auto istripu batean seme
bat galdu duen amari,
elbarritasun bat daukanari
minbizia daukanari
maitasunean bihotza mila
puska egin zaionari,
bizitza ez da beti izaten
irrifarraren atari,
txapel bat nola eman didaten
beste behin ere opari,
daukadan poza ematen diot
sufritzen ari denari.
Puntuazioak
Julio Soto. 759 puntu
Xabier Silveira. 754,5 puntu
Estitxu Arozena. 527,5 puntu
Jon Barberena. 515,5 puntu
Julen Zelaieta. 512,5 puntu
Xabier Terreros. 507 puntu
Eneko Lazkoz. 495 puntu
Oskar Estanga. 479,5 puntu.