Haririk gabe Interneterako sarbidea eskaintzen duen WiFi zerbitzua paratuko du Udalak herri inguruan. Udaletxeko teilatuan eta bertze bizpahiru tokitan antenak jarriko dira horretarako, eta herrigunean ez ezik, herri sarrerako bidegurutzean dauden etxeetara ere ailegatuko da Interneten seinalea.
Lan hauen ardura, Bilboko Iritel enpresari esleitu dio Udalak eta azken orduko aldaketarik ezean, joan den astean hastekoa zen horretan. Hilabete eta erdiko epea izanen du dena akitzeko eta «Aste Santurako martxan egonen dela» espero du Alberto San Migel alkateak.
Dirulaguntza
WiFi sarea instalatzeko dirulaguntza ere hartuko du Udalak, aurrekontuaren %70ekoa, hain zuzen. 15.000 euro inguru jasoko dira.
Alkateak azaldu digunez, behin instalazioa egindakoan, teknikoek bilera orokorra eginen dute interesatu guztiekin eta seinalea ongi hartzeko zer egin beharko den esplikatuko zaie. Etxe bakoitzean antena ttiki bat paratzea da seinale ona izateko teknikoek aholkatzen dutena.