Martxoaren 4an, ostegunarekin, Eratsun, Saldias eta Beintza-Labaiengo eskoletako ikasleak hiru herrietan barna ibili ziren kantatzen eta dantzatzen, Joana Estanga trikitilari zutela. Eta lerro hauen bidez, eskerrak eman nahi izan dizkiete eskolakoek Joanari. Inauterien seinale, denak pirataz mozorratu ziren, irakasleak barne.
Lehenengo buelta, Eratsunen egin zuten eta argazki batzuk atera ondotik, Eratsungo gurasoek hamaiketako bat prestatu zieten. Segidan, Saldiaserako bidea hartu zuten eta hemen, zenbait karriketan barna ibilitakoan, beste hamaiketakoa eduki zuten. Geroago, eskolan deskantsatu, gehiago jan eta Beintza-Labaienera abiatu ziren. Han Labaiengo herriari itzulia eman eta etxe batean indarrak berritzeko jatekoa eskaini zieten. Gero, berriz, herriko eskolako parkean jolastu eta bazkari-berenduan, tortilla, txistorra, marrubiak eta patatak jan zituzten. Akitzeko, argazki batzuk atera eta bakoitza bere etxera joan zen. Egun ederra atera zen argazkietan ageri den pirata kuadrillarentzat.