Urteetan zabalik egon ondotik, aurtengo inauteriak pasatuta itxi zituen ateak Herriko Ostatuak. Geroztik, halaxe egon da. Udalak horri irtenbidea emateko, errentan hartzeko deialdia zabaldu zuen herritarren artean. Baina epearen barrenean, ez zen herriko inor aurkeztu eta hortaz, herritik kanpo deialdi zabalagoa egitea erabaki du Udalak. Lerro hauek idazterakoan, oraindik argitaratu gabea zen deialdia Nafarroako Aldizkari Ofizialean, baina argitaratzen denean irekiko da eskaintzak aurkezteko epea.
Baldintzak
Herritarrei egindako deialdian eta kanpora begira eginen denean ere baldintzak berdinak izanen dira. Hilabeteko prezioa 350 eurotan (BEZa kontuan hartu gabe) finkatu dute Herriko Etxean, eta errentaren iraupena bortz urterako izanen da. Gerora, gehiago luzatzeko aukera ere izanen da.