Erreka Elkarteak bederatzigarren aldiz antolatutako Malerrekako Eskuz Binakako Pilota Txapelketaren finalak martxoaren 5ean jokatu ziren Doneztebeko frontoian. Goiz eta arratsaldez, zazpi kategoriatan aritu ziren pilotariak.
Benjaminen mailan, Oberenako Oskozek eta Cuairanek 18-15 irabazi zieten Ilunpeko Alberdi eta Galarragari.
Alebinetan, Ilunpeko Egiguren eta Alberdi nagusitu ziren, 18-7 irabazi zieten Errekako Zubizarreta eta Salaberriari.
Infantiletan Donibaneko Laso eta Arandiak irabazi zuten. Taldekide dituzten Bakaikoa eta Medina 12 tantorekin utzi zituzten.
Kadeteen kategorian, Zugarraldekoak nagusitu ziren: Larunbek eta Sarasak 18-15 irabazi zieten Oiarpeko Ugalde eta Imazi.
Jubeniletan Añorgako Barandiaran eta Sanchezek irabazi zuten, 22-20ko markagailuarekin Errekako Maia eta Amurrioko Legarretari nagusitu zitzaizkien.
22 urtez azpikoen mailan tanto bakarragatik, Intxurreko Urretabizkaia eta Otegik irabazi zuten; 22-21, Errekako Juanenea eta Zugarraldeko Lukin hartu zituzten mendean.
Maila nagusian edo senior elite mailan, azkenik, Aurrera Saiaz taldean ari den Unai Onsalo aresoarra eta Txarutako Xabi Arraztoa iruritarrak eskuratu zuten txapela. 22-16 irabazi zieten Esain profesional ohiari (Buruz Gain taldean ari da) eta Erreka elkartean ari den Joseba Madariaga aranztarrari.
Bigarren mailakoak
Txapelketa nagusiarekin batera, aitzineko asteburuan, Errekako pilotarien arteko buruz buruko txapelketaren finalak jokatu ziren Doneztebeko eskolako frontoian.
Benjamin E mailan, Gelbentzuk 18-13 irabazi zion Arregiri. Benjamin D kategorian, Aldabe 18-14ko emaitzarekin nagusitu zitzaion Porturi. Benjamin C mailan, Telletxeak 18-11 irabazi zion Oiartzabali. Benjamin B kategoriako final estuan, Saldiasek 18-17 irabazi zion Mitxeori. Benjamin A kategorian, Agirre 18-7 nagusitu zen Zestauren kontra.
Bigarren mailako alebinetan Zelaietak 18-17 irabazi zion Erasuni.
Bigarren mailako infantiletan, Saldias nagusitu zen, 18-7 Arrietari irabazi ondotik.
Infantiletan, Fagoagak 18-14 irabazi zion Salaberriari.
Bigarren mailako kadeteetan Saldiasek 22-12 irabazi zion Etxekoloneari eta kadeteetan, Elizalde nagusitu zen, 22-13 irabazi zion Telletxeari.