Senpere egun eta bihar taldeko bi hautetsik salaketa aurkeztu dute berriki poliziaren kontra, agente batzuek erakutsi dieten bortizkeriagatik. Iparraldeko zonbait lagun eta hautetsik bezala, Jean François Bederedek eta Eliane Etxeberriak elkartasuna erakutsi zieten Izpuran bildu ziren Segiko zortzi militanteei. Hegoaldeko zortzi gazte hauen kontrako atxilotze euroagindua aurkeztu zuen Espainiako justiziak eta neurri horren kontra altxatu ziren hautetsiak.
Bederedek bi gazte aterpetu zituen etxean, Senperen, eta poliziak biak arrastatu zituen martxoaren 2an Bederede eta Etxeberriarekin Baionarat joaten zirelarik. Jean François Bederedek TTIPI-TTAPAri erran dioenez, arrastatze «aski bortitza izan zen, kolperik gabe baina poliziak bere armak erakutsi zituen». Gero Baionan prentsaurrekoa eman ondoren Segiko gazteen egoerari buruz, Bederedek eta Etxeberriak herrirako bidea hartu zuten eta haiez gain Iparraldeko bertze bi hautetsi eta Endika Perez Segiko gaztea zeuden Bedereden autoan. Basusarri aldean, autoa geldiarazi zuen poliziak Segiko gaztea arrastatzeko. Lekukoen arabera, hautetsiak eta kazetariak, operazioa biziki bortitza izan zen. «Polizia ikusi genuen segika baikenuen eta pentsatu genuen operazioa lasaiki egiten ahalko zela», dio Bederedek. Alta, goizekoa baino bortitzagoa izan zen bidean berean lurrerat bota baitzuten atxilotua esku burdinak emateko. Gainerat, Bedereden autoaren ate bateko berina hautsi zuten poliziek. Berriz ere armak erakutsi zizkieten inguruetan ziren hautetsiei. Lekukoen arabera, «dena biziki laster gertatu zen eta biziki bortitza izan zen, goizeko atxilotzeak baino bortitzagoa».
Egun osoan iragan ziren gertakariak salatzeko elkarretaratze bat egin zen arratsean berean Herriko Etxe aitzinean eta 120 bat pertsona bildu ziren. Atxiloketen lekukoak izan ziren eta poliziaren bortizkeria jasan zuten bortz hautetsien abokatak salaketa aurkeztu zuen poliziaren aurka Baionako prokuradorearen aitzinean martxoaren 10ean. Ikerketa poliziala irekiko da, beraz, gertaera argitzeko eta horren ondotik prokuradoreak deliberatuko du poliziak auzipetzen dituen edo ondoriorik gabe uzten duen afera. Salaketa gerokorik gabe geldituko balitz, instrukzio epaile batengana joaten ahal lirateke hautetsi hauek, hauen artean Bederede eta Etxeberria.
Bertzalde, euskal militanteen aurkako euroagindu eskaerak salatzeko giza kate erraldoia egin zen martxoaren 5ean Baiona eta Angelu artean. Antolatzaileen arabera 1.500 lagunek parte hartu zuten protesta horretan. Azkenik, lerro hauek idatzi zirelarik Izpuran bildu ziren Segiko zortzi gazteen artean lagun bakarra zegoen aske oraino eta bere aldeko bi asteko barauldia hasi zuten Hendaian Iker Elizaldek eta Xabi Hirigoienek Hendaia eta Beskoitzeko hautetsiek.
PEREZEN ATXILOKETA
«Biziki bortitza izan zen, goizeko atxilotzeak baino bortitzagoa»
Endika PEREZen atxiloketaren lekukoak