Aldi honetan ere, ihauteriak behar bezala ospatu dituzte gazteek. Aurten, mozorroentzako egin dituzten indarrak azpimarratzekoak dira. Izan ere, euskal ihauteri tradizionaletako pertsonaia gehienak bertan izan dira: kotilungorri, kaskarrotak, momotxorroak, zirtzilak eta nola ez hartza. Eskeak 09:00etan abiatu ziren, gazteak traktore batek zeraman orga batean kantari zirela.
Parte hartu duten 40 gazteek Elbarrun, Ihalar eta Lehenbizkaiko auzoetan ukan duten harrera eskertu nahi lukete.
Biharramunean, Zazpiak Bat dantza taldeak, Olhain ikastolak eta Etxola gaztetxeak plaza girotu zuten bertaratu zirenen bozkarioarendako. Dantza taldeko dantzariek haien trebezia erakutsi zuten, ikastolako haurrek alaiki kantatu musikariek lagundurik eta bukatzeko, gaztetxeko kideek erre aitzin epai zorrotz bat egin zioten Zanpantzarri.
Ondotik, ikastolako burasoek, 90 pertsonendako bazkari goxo bat eskaini zuten plazaren erdian.
Bertzalde, ortziral gauean, Sarako Ondareak antolatutako gaualdira jende frango hurbildu zen. 50 bat pertsonek Claude Labaten hitzaldiarekin gozatu zuten.