Adinekoen memoria biltzeko eta kontserbatzeko proiektuaren barrenean, Eguzkia lainopean izeneko dokumentala aurkeztu zuen Bidelagun elkarteak martxoaren 11n Elizondoko Arizkunenea Kultur Etxean. Ikusentzunekoa Gure adinekoen memoria. Oroitzapenak eta bizipenak proiektuaren lehendabiziko ekimena da eta 65 urtetik goitikoen esperientziak eta testigantzak biltzea du helburu, gainerako belaunaldiek bizitzaren zentzuaz, sormenaz, familiaz, bertako ohiturak mantentzeaz, lurrarekiko maitasunaz eta bertze arlo batzuetaz hausnarketa egin dezaten. Adinekoen esperientziak elkarrizketen bidez bildu ondotik, herriz herri solasaldiak eginen dira, Oroitzapenen Mahaiak osatuko dira eta ikastetxeendako material didaktikoa eginen da. Eguzkia lainopean lehenbiziko dokumental honetan emakume baserritarrak ageri dira batez ere, Arraiozko Mikaela Juanikotena eta Rosario Karrikabururi egindako elkarrizketekin.