Eratsun aldean lurperatuak izan ziren hiru makien arrastoak aurkitzeko lanak oraindik bukatu gabeak badira ere, Ezkurran lurperatuak izan ziren beste maki batzuen datuak jaso ditugu. Zehazki, Ollin auzoan eman zitzaien lurra. Juanito Telletxea Ollingo auzotarraren hitzetan, Mikelenea bordako presak eta zentral elektrikoaren kanala abiatzen den tokiak muga egiten duten eremuan bi maki lurperatu ziren. Bere ustetan, ezinezkoa izango da maki haien arrastoa aurkitzea, 1947ko ur erauntsi izugarriak inguru hori hondatu egin baitzuen. Beste hiruzpalau maki lurperatu ziren tokia zentral elektrikotik hurbil dagoelakoan dago Telletxea.
Garai hartako udal aktak begiratu ondoren, ez da makien heriotzaren aipamenik ageri, baina guardia zibilek behin baino gehiagotan Barrankan eta Matxonean gauak pasatu zituztela bai ageri dela, eta gastua Udalak ordaindu omen zuen. 1946an eta 1947an, sei hilabetez armadako konpainia bat egon omen zen Ezkurran, makien harat honatak ugariak ziren ingurua kontrolatzeko. Halaxe ikus daiteke aktetan. Are gehiago, Udalak tropen buruengana ere jo behar izan omen zuen bost hilabetez herri lurretatik hartu zuten egurra ordain zezaten eskatuz. Herritarren arabera, herriguneko hiru etxe ere okupatu zituzten.