Herriz herri eta herrialdez herrialde mus txapelketak jokatu ondotik, martxoaren 12an jokatzekoa zen Urruñan (Lapurdi) Euskal Herri Mus Txapelketaren final haundia. Nafarroatik 32 bikote ailegatu ziren finalera, eta horien artean eskualdeko hamar: Aresoko Gorka eta Imanol; Leitzatik hiru bikote, Hegoi eta Galindo batetik, Joxe Mari eta Karlos bertzetik eta Mikel eta Xabier ere bai; Berako Asier eta Bernard; Arraiozko Igor eta Peio; Doneztebeko Jon eta Joxe; Elizondoko Patxi eta Julio; Erratzuko Marko eta Joseba eta Oronoz-Mugairiko Patxi eta Joseba. Lerro hauek idazterakoan, oraindik zehaztu gabea zen bikote hauek zer egin zuten final haundian. Baina nabarmentzekoa parte-hartzaile kopuruaren gorakada izan da, Euskal Herri osoko 2.200 bikote baino gehiagok jokatu baitute musean zazpi herrialdeetako 250 herritan. 2009ko txapelketan 1.120 bikotek parte hartu zuten, 2010ean 1.800 bikote animatu ziren eta aurten, markak hautsiz, 2.207 bikote aritu dira.