Suhiltzaile boluntarioen sarea sustengatzeko hitzarmena berritu dute Nafarroako Gobernuak eta Agoitz, Bera, Goizueta, Leitza, Lesaka eta Luzaideko udalek. Martxoaren 3an egin zuten Nafarroako Jauregian, Iruñean, akordioa berritzeko sinadura. Abudo, Izabako Udalarekin ere berrituko du Gobernuak hitzarmena.
Nafarroako Larrialdi Agentziarekin batera lan egiten duten 145 suhiltzaile boluntarioek osatzen dute sarea eta sua itzaltzen, errepideak garbitzen, zuhaitzak kentzen, galdutako pertsonak bilatzen, erreskateetan, anbulantzia trasladoetan edo parkeetako mantenu lanetan aritzen dira.
Javier Caballero, Nafarroako Gobernuko presidenteorde eta Presidentzia, Justizia eta Barne kontseilariak eta David Sainz Nafarroako Larrialdi Agentziako zuzendariak sinatu zituzten sei hitzarmenak Nafarroako Jauregian, herri bakoitzeko alkateekin batera: Agoizko Francisco Jose Enguita, Berako Josu Iratzoki, Goizuetako Miel Joxe Lekuona, Leitzako Xabier Zabalo, Lesakako Juan Fermin Mitxelena eta Luzaideko Fernando Alzon.
Javier Caballerok aipatu zuenez, boluntario taldeek profesionaltasun handiz lan egiten dute eta suhiltzaile profesionalak hain erraz ailegatzen ez diren lekuetan nahitaezkoak dira.
DATUA
4 UDAL dira hitzarmena berritu diren eskualdeko ordezkaritzak: Bera, Goizueta, Leitza eta Lesaka.