Udaletatik Nafarroako Parlamentura hedatuko da torturaren aurkako ekimena Nafarroan. Gernikako Akordioaren sinatzaileen ekimenez, martxoaren 3an NaBaik azken hilabeteetan Nafarroan izandako polizia operazioetan izan diren tortura salaketak ikertzeko batzordea eratzea eskatuko du.
Era berean, giza eskubideen defentsan aritzen diren erakundeek tortura saihesteko ematen dituzten gomendioak bilduko dituen legez bertzeko proposamena ere aurkeztuko du. Ezberdintasunen gainetik konpromisoak hartzea nahi dute. Era berean, azken egunetan Nafarroako hainbat udaletako osoko bilkuretan torturaren aurkako mozioak onartu dituzte, hala nola Zizur Nagusian, Berriozarren, Uharten, Altsasun, Lakuntzan, Arbizun, Uharte Arakilen, Beran, Etxalarren, Leitzan, Sunbillan... eta datozen asteetan herri gehiagotan eztabaidatu eta onartuko dira.
Ekimenok Aralarrek, EAk, ezker abertzaleak, LABek, EILASek, EHNEk, ESK-k eta Hiruk babestu dituzte, bertzeak bertze.
Torturaren aurkako ekimen honen aurkezpena martxoaren 2an egin zen Iruñean eta bertan izan ziren Patxiku Irisarri Etxalarko alkatea eta Aitor Etxarri, EAko zinegotzia Leitzan eta NABAIko parlamentaria.