Hasiera batean otsailaren 26rako iragarriak bazeuden ere, asteburu horretan Euskal Ligako partidak zirela-eta, azkenean astebete gibeleratu egin behar izan ditu Erreka Kirol Elkarteak Malerrekako eskuz binakako IX. pilota txapelketaren finalak. Hala, larunbat honetan, martxoak 5, jokatuko dira Doneztebeko udal pilotalekuan.
Zazpi kategoriatan jokatuko dira finalak. Goizez 10:30etik aitzinera benjaminak, alebinak eta infantilak ariko dira, eta arratsaldean, 16:30ean hasita, kadeteak, jubenilak, 22 urtez azpikoak eta elite mailako seniorrak. Kategoriaz kategoria, hauek izanen dira pilotariak.
Benjaminetan, Ilunpeko Alberdi eta Galarragak, Obereneko Oskoz eta Cuairanen aurka jokatuko dute.
Alebinetan, Errekako Zubizarreta eta Salaberria, Ilunpeko Alberdi eta Egigurenen kontra ariko dira.
Infantiletan, Donibaneko Bakaikoa eta Medinak, taldekide dituzten Laso eta Arandia izanen dituzte arerio.
Kadeteetan, Zugarraldeko Larunbe eta Sarasak, Oiarpeko Ugalde eta Imazen kontra jokatuko dute.
Jubeniletan, Errekako Maia eta Lasa, Añorgako Barandiaran eta Sanchesen aurka ariko dira.
22 urtez beheitikoetan, Errekako Juanenea eta Zugarraldeko Lukinek, Intxurreko Urretabizkaia eta Otegi izanen dituzte kontrario.
Maila nagusian, azkenik, Iñaki Esain profesional izandakoak eta Joseba Madariaga aranztarrak osatuko dute bikotea, eta Unai Onsalo aresoarraren eta Xabi Arraztoa iruritarraren kontra ariko dira.