Euskarazko 80 euskarazko hedabidek baino gehiagok «tamainako apustu eta sostengu ekonomikoa» eskatu diete instituzioei, «komunikazio munduan gertatzen ari diren aldaketak eta krisi ekonomikoak gogor astindu dituelako euskarazko hedabideak, lehendik ere diru baliabidez larri zebiltzan hedabideak». Halaxe adierazi zuten hainbat hedabidetako ordezkariek otsailaren 15ean Donostian eskainitako agerraldian. Duela zenbait aste euskarazko hedabideek editorial bateratua argitaratu zuten [ikusi TTIPI-TTAPAren 536. alea] eta otsailaren 15eko agerraldia elkarrekin egindako bertze urratsa izan zen.
Ehundik goiti
Euskarazko hedabideak 100dik goiti dira, prentsa, irratia, telebista eta Internet kontuan hartuta eta 620 langile baino gehiagok egiten dute lan hedabide horietan. Urtean 27.000.000 eurotik gorako aurrekontua dute eta 7.000.000 euro inguru sortu eta ordaintzen dute zuzenean gizarte segurantza eta zerga bidez. Dirulaguntzen bidez, berriz, 7.500.000 euro hartzen dira. 2007ko abenduan CIES ikerketa etxeak egindako azterketa baten arabera, euskarazko hedabideak 450.000 lagunengana ailegatzen dira, alegia, euskaldunen %57rengana.
Agerraldian azaldu zutenez, «datu hauek guztiek erakusten dute sektore bizi eta kontuan hartzeko bat osatzen dugula, zalantzarik gabe, gizarte honetan era askotako irabaziak sortzen dituena». Horren erakusle, adibideak aipatu zituzten: «informazio mailan, gizartearen informazio eskubidea asetzeko bidea ematen duen sektorea delako; euskararen normalizazioan, aho batez, onartzen den bezala, hizkuntza normalizaziorako eragile nagusietakoak direlako hedabideak; arlo ekonomikoan, lanpostuak sortzen dituelako, eta kontuan hartzeko moduko ekarpena egiten duelako sektoreak gizarte segurantza eta zerga bidez».
Krisiaren eragina somatu dutela ere jakinarazi zuten «gogor astindu» dituela erranez, baina horrekin batera, zera gaineratu zuten: «erronka berriei aurre egiteko sostengu erantsi bat behar izan dugunean, laguntzak murriztuta ikusi ditugu, krisiaren aitzakian. Horren ondorioz, gure borondatearen kontra biziraupena gure egunerokoaren erdigunean kokatu da». Egungo laguntzek «kasurik onenean prekarietatean bizirauteko aukera eskaintzen» dutela ere adierazi zuten, «garatzeko aukerari hegoak moztuz. Era berean, hainbat hedabideren ateak ixten ikusi ditugu azken aldian».
Horregatik eskatu dituzte «laguntzetan baliabide handiagoak», baita «egungo laguntza deialdiaren dinamikatik bide egonkorragoetarako urratsa» ere. Publizitatearen gaian, «publizitate instituzionala egiterako orduan bertze politika baten beharra» ere nabarmendu zuten.
Hemendik aitzinera, egoerari eta zailtasunei elkarrekin aurre egiteko, ekimen gehiago eginen dituzte euskarazko hedabideek. Instituzio nagusienetako eta alderdi politikoetako ordezkariekin elkartzeko asmoa ere badago eta webgunea ere sortua dute: http://www.blogak.com/ehedabideak.