Aurtengo aurrekontua onartu dute hautetsiek gehiengoaren bozekin eta oposizioko sei lagunen kontrako iritziarekin. Aurten 5 273 893 euroko funtzionamendua izanen du Herriko Etxeak eta inbestizamenduak 6 483 586 eurokoak izanen dira. Orotarat, 2 673 000 euroko mailegua eginen du herriak lan haundiak egiteko: Zaia bidea berritzeko Bizi Garbia alde hortan, Karrika Nagusia apaintzeko, Inargako bidea eraikitzeko, Herriko Etxea moldatzeko, herriko langileen biltegi berria altxatzeko, ondoko urteetan eraikiko den kultura areto berriaren ikerketak egiteko eta tenis jokalarien etxea egiteko aintzira auzoaren sartzean. Oposizioak horren kontra bozkatu du deitoratzen baitu ez dela epe luzeko gogoetarik egiten bat bateko lanak baizik.