Saint Christophe laborantza lizeoak ateak hetsi behar izan ditu zonbait egunez otsail hastapen huntan hazteria izurrite bategatik. Aspaldian ez zen holakorik entzun hemen gaindi eta horrek harridura haundia sortu du ikasle, agintari eta berriemaileen artean. Orotarat, 12 ikaslek jasan dute hazteria eta izurritea gelditzeko lizeoa hetsi eta osoki garbitu behar izan dute. Azkenean, behar diren arta guziak hartu ondoan, otsailaren 8an ikasgeletarat itzuli ziren 171 ikasleak eta 30 irakasleak, eta den denak lanean hasi dira berriz. Hazteria uste baino maizago agertzen den gaitza da eta izenak beldurra sortzen badu ere medikuek diote ez dela hain larria behar bezala artatzen bada bistan dena.
Laborantza ministroa ez da eritu
Egun gutitan bi aldiz aipatua izan da gure laborantza lizeoa hazteria izurritea agertu baino egun batzuk lehenago Bruno Le Maire Frantziako laborantza ministroak bisita egin baizuen eskola hortarat. Ministroak ongi ezagutzen du gure herria bertan kokatzen baita bere udako etxea. Umore pixka batekin deplauki erran zuen lehen aldia zela ttattara janzten zuela Senperen, usaian hori gabe ibiltzen baita gure herrian oporrak pasatzen dituelarik. Lizeoa eta INRA agronomia ikerketa gunea bisitatzeaz gain, ministroak hemengo zonbait aldarrikapen entzun zituen. Ipar Euskal Herriko zonbait laborarik ez dute begi onez ikusten Eslobeniako hartz bat gehiago askatzea Biarnoko mendietan. Ardi esnearen prezioak eta gazteek instalatzeko dituzten zailtasunek ere kezkak sortzen dituzte.
Senperen gaindi pasako den abiada haundiko treinbide berriaren inguruan, ministroak dio proiektua berriz aztertua izan behar dela hobetua izateko. Ministroak harremanetan segituko du gure laborariekin ondoko egunetan Parisen ospatuko den laborantza saloinean elgarrekin mintzatuko direlakoz berriz ere. Gobernuko idazkariek argitu dute ministroa ez zela kutsatua izan hunat egin zuen bisitan eta ez zuela hazteria jasan.