40. ediziora ailegatu da egun gutti barru hasiko den Nafarroako Bertsolari Txapelketa. Larunbat honetan, otsailak 19, abiatuko da Tafallan eta apirilaren 9an amaitu Iruñean.
Joan den urtean bezala, 27 bertsolarik hartuko dute parte Nafarroako Txapelketaren edizio honetan. Xabier Silveira (Lesaka); Eneko Lazkoz (Etxarri-Aranatz); Oier Lakuntza (Iruñea); Aritz Saragueta (Betelu); Aimar Karrika (Auritz); Egoitz Gorosterrazu (Ituren); Oskar Estanga (Gaintza); Xabier Terreros (Lesaka); Jose Luis Barberia Zili (Leitza); Josu Sanjurjo (Lesaka); Iñigo Ibarra (Iruñea); Estitxu Arozena (Lesaka); Iñaki Aleman (Irurita); Iban Garro (Lesaka); Patxi Castillo (Bera); Ander Fuentes Itturri (Zubieta); Ekaitz Astiz (Iraizotz); Saioa Alkaiza (Antsoain); Bittor Elizagoien (Arraioz); Julio Soto (Gorriti); Migel Mari Elosegi Luze (Leitza); Iñigo Olaetxea (Lesaka); Jon Barberena (Elizondo); Jon Elizetxe (Gartzain); Ainhoa Aranburu (Iruñea); Julen Zelaieta (Bera) eta Irati Majuelo (Iruñea).
Parte-hartzaileen kopurua joan den urteko berdina da, baina bertsolariak ez dira berak, bortz bertsolari estreinakoz ariko baitira Txapelketan: Josu Sanjurjo, Iban Garro, Ainhoa Aranburu, Irati Majuelo eta Patxi Castillo. Iaz parte hartu ez zuen Xabier Silveira txapeldun ohia ere berriro taula gainean izanen da aurten. Lehengo urtean bai, eta aurten parte hartuko ez dutenak, berriz, Iker Gorosterrazu eta Alazne Untxalo iturendarrak, Diego Riaño leitzarra, Ioar Tainta lesakarra, Xabier Legarreta aranoarra eta Lekunberrin bizi den Arkaitz Goikoetxea dira.
Finala Iruñean
Azken urteotako egiturari segituko dio Nafarroako Bertsolari Txapelketak: lau azken-laurden, hiru finalaurreko eta finala izanen dira. Lehendabiziko fasean, Tafallako Santa Maria parrokia aretoan (otsailak 19), Irurtzungo Kultur Etxean (otsailak 20), Doneztebeko zineman (otsailak 26) eta Berriozarko Musika Eskolan (otsailak 27) izanen dira saioak. Finalaurrekoak Berako Kultur Etxean (martxoak 12), Leitzako zineman (martxoak 19) eta Elizondoko Lur aretoan (martxoak 26) eginen dira. Emanaldi guztiak 17:30ean hasiko dira.
Finala da aurtengo nobedaderik haundiena, aspaldiko partez Iruñean jokatuko baita. Apirilaren 9an izanen da, 17:00etan hasita Labrit pilotalekuan. Zortzi bertsolari lehiatuko dira.
DATUA
16 BERTSOLARI
dira Bertsolari Txapelketan parte hartuko dute eskualdekoak: Silveira, Gorosterrazu, Terreros, Zili, Sanjurjo, Arozena, Aleman, Garro, Castillo, Itturri, Elizagoien, Luze, Olaetxea, Barberena, Elizetxe eta Zelaieta.