Giro bikainean joan dira inauteriak. Ortzeguneko puxka biltzearekin hasi ziren; ortziralean eskolako umetxoek mozorroekin kalejiran eta joaldun ttikiekin ospatu zuten eta larunbat arratsa iritsi zenean, inauteriek egun luze eta politen martxa hartu zuten, jendeak erran bezala, gure inauteriak sanferminak bezain luzeak baitira. Astelehen goizean, Aurtizko elkartean eta Iturengo Herriko Etxeko Ganbaran joaldun kuadrilla jantzi zen ongi gosaldu ondotik. Zahar, gazte eta haur, joaldunak ez baitu mugarik adinean, odolean eramaten da. Aurtegoan ere astelehen eta asteartean joaldun andana elkartu ziren hiru lekuetatik. Tartean, Ituren eta Aurtizko Hartzak bidea irekiz eta jendeari pixka bat zirikatuz joan ziren. Inauteriak joaldunengatik dira ospetsuak, baina tartean karroza eta mozorro eleganteak atera ziren. Etxeko txokoetatik ateratako trapuekin egindako mozorroak ere ikusi ziren. Inauteriak akitzeko, Iturenen kontuen eguna egin zuten, herriko dantzarien erakustaldia, gazte eta ezkonduen arteko herriko kirol desafioa eta bertso afari ederra tartean. Bertzalde, Aurtitzen zaharren afariarekin akitu ziren inauteriak. 70 lagun elkartu ziren elkartean giro bikainean afalduz eta Joxe Anjel akordeoilariaren doinuekin dantzatuz. Igandean kontuak ordaindu eta bazkaria egin zuten. Hemen aipatzeko kexu bat ere egin digute: inauterietako astelehen goizean lanetik heldu ziren bi herritarrek ezin izan zuten Elgorriagako bainuetxetik pasatu. Han zeuden foru poliziek oinez joateko agindu omen zieten. Herritarrek nortasun agiria ere erakutsi omen zieten, baina alferrik.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun