Bidasoa eta Urumea ibaietako arroak modu bateratuan kudeatzeko helburuarekin, mugaz gaindiko Bidur proiektua garatuko da. Bidasoa eta Urumearen arroen kudeaketaren alderdiak metodologia bera erabiliz aztertu nahi dira, bi ibaiek antzeko ezaugarri ekologiko eta hidrologikoak dituztelako. Hain zuzen, horixe izan zuten hizpide otsailaren 9an Bertizko Jaurrerria Natur Parkean egindako saio informatiboan.
Bidur proiektuak Pirinioen bi aldeetan uraren kudeaketa integralaz arduratzen diren entitate publikoen parte-hartzea bultzatzen du, ezagutzak trukatuta, berrikuntza-neurriak zabalduta eta bi ibai arroetan inplikatutako sektoreen artean lankidetza indartuz. Proiektuaren aurrekontua 2,3 milioi eurokoa da. Kopuru horren %65 (1,5 milioi euro) Europar Batasuneko Eskualde Garapeneko Europako Funtsak (EGEF) bideratuko du, eta gainerakoa proiektua garatzeaz arduratzen diren mugaren bi aldeetako hiru erakundeek finantzatuko dute: Narroako Gobernuko Landa Garapen eta Ingurumen Departamentuaren esku dagoen GAVRN Nafarroako Ingurumen Kudeaketa, Haztegiak eta Birpopulatzeak sozietate publikoa da proiektuaren burua eta 1,2 milioi euro emanen ditu; Gipuzkoako Aldundiko IKT Nekazal Ikerketa &Tecnologia izenekoak 552.000 euro, eta Pirinio Atlantikoetako Kontseilu Orokorrak 590.000 euro.
Proiektuan aurreikusitako jarduerei buruzko hiru solasaldi ere eskaini ziren hilaren 9an: Javier Castiella Nafarroako Gobernuko Baliabide Hidrikoen Ataleko buruak eta Miren Errandonea GAVRN sozietate publikokoak ur baliabidearen erabilgarritasunari buruz hitz egin zuten; Fernando Mendozak arroa iragazkortzeko eta konpontzeko proiektu pilotua aurkeztu zuen, eta Isabel Ibarrolak Bidur proiektuaren web orria aurkeztu zuen.