Aurtengo inauteriek badute eguna: otsailaren 12an ospatuko dira, eta gainera, egun osoko egitaraua antolatu da. Goizean herriko elkartean eginen den gosariarekin emanen zaie hasiera. Ondotik, etxez-etxe puskak biltzen ibiltzeko nahia baldin badago, horrela eginen da. Haurrak, gazteak eta gogoa duten guztiak ibil daitezke eskean.
Goizeko itzuliaren ondotik, eguerdian, 13:00 inguruan, herriko elkartean bazkaria izanen da. Aipatu, haur eta gaztetxoek dohainik izanen dutela otordua, baina hori bai, mozorrotuta joan beharko dute bazkarira.
Bazkaldutakoan, falta diren etxeetara eta baserrietara joanen da animatzen den guztia.
Gauean afaria
Egunez eginen diren harat-honaten ondotik, afaria Herriko Ostatuan eginen da. Eta afarira joan nahi dutenek aitzineko egunetan apuntatu beharko dute, Herriko Ostatuan horretarako paratua egonen den orrian.
Gosaritik afaria bitarte herria Frantzisko akordeoilariak animatuko du. Beraz, besta pixka bat egin nahi duenak animatu eta parte hartu bertzerik ez dauka.