Elgorriagako Balnearioak Espainiako Kalitate Turistikorako Institutuak (ICTE) banatzen duen Kalitateko Q ziurtagirietako bat jaso zuen urtarrilaren 19an Madrilen, Fitur feriaren ekitaldien barrenean.
Ziurtagiri banaketa ekitaldia Santiago Bernabeu futbol zelaiko ohorezko palkoan egin zen, 1.300 gonbidatu baino gehiagorekin. 2010ean Kalitateko Q ziurtagiria estatu osoko 923 erakundek lortu edo berritu zuten eta horietako bat izan da Elgorriagako bainuetxea.
Lorena Galarregi, bainuetxeko zuzendariak jaso zuen ziurtagiria eta honek “balnearioa osatzen dugun lan-talde osoaren esfortzua” saritzen duela uste du, “gehiago, hain denbora gutti daramagunean zabalik”. Paper aunitz bete behar badira ere, Q ziurtagiriak eguneroko lanean laguntzen duela uste du Galarregik “kontrola eraman behar duzulako eta kalitatezko zerbitzua eskaintzeko motibazio handiagoa da”.