Jokin Etcheverria senpertarra ETBn agertzen da berriz ere garai hauetan Chiloe bidaia programaren bitartez. Seigarren denboraldia eskaini dute berriki euskaraz ETB3 katean eta egun hauetan ETB2n ari dira ematen gaztelaniaz. Jamaika, Kroazia, Kuba, Austria, Frantzia eta Quebec bisitatu dituzte aldi huntan. Abentura berri horietan ez dute bertako gidarik edo itzultzaileen laguntzarik izan behar lantaldea aise moldatu baita inglesez, gaztelaniaz eta frantsesez.
Gaztea pozik dabil Chiloe dokumental saila egiten. Umoretsu agertzen da beti, hurbileko harremana izaten erdiesten du bisitatzen dituen herrietako jendeekin eta gainerat, dioen bezala: ordaintzen dute bidaia horiek egiteko! Bera bezalako berriemaile gehiago ikusi nahi lituzke, zoritxarrez munduan barna gerlako berriemaile berezi gehiago baita kultura eta bidaia kazetariak baino. ETBz gain, bertze toki frangotan ikusten ahal da Chiloe: Extremadurako telebistan eta RENFErentzat Espainian barna bidaia luzeak egiten dituzten treinetan. Gainerat, Kataluniako telebista publikoak dokumentala erosi du eta ondoko egunetan TV3 telebistan katalanez agertuko da senpertarra.