Urtero bezala, Zuzendaritza Batzordean aldaketak egin ditu Kasino elkarteak. Ilbeltzaren 16an egin zuen urteko batzarra eta zuzendaritzako sein lagunetatik hiru atera eta hiru bazkide berri sartu ziren: Jabi Juanotena, Peio Sanz eta Juan Karlos Sein dira berriak. Bi urteren ondotik kargua utzi dutenak, berriz, Luis Miguel Apezetxea, Patxiku Ganboa eta Jabier Jabalera dira.
Juntako kide berriek euren karguak izanen dituzte. Hala, Juanotena lehendakariordea izanen da, Sanz idazkariordea eta Sein bigarren bokala. Joan den urtean zuzendaritzan sartu ziren hiru kide berriek kargu nagusiak hartu dituzte aurten: Fran Indart lehendakaria izanen da, Itziar Zelaieta idazkaria eta Santi San Miguel bokala. Heldu den urtean berriz berrituko da zuzendaritza eta aurten ordezkoak direnek kargu nagusiak hartuko dituzte, eta sartzen diren berriak ordezkoak izanen dira.
Bertzalde, aipatu, urte aunitzetan egin duen bezala, Mayi Ruizek berrituko duela bodega.
Bazkide gehiago
Gaur egun, 255 bazkide inguru ditu Kasino elkarteak. Azken batzarrean zazpi baja egon ziren –lauk euren borondatez utzi dute elkartea eta hiru hil egin direlako– eta 12 alta eta eskualdaketa bat ere izan ziren –azken honetan attak utzi eta semeak hartu du bazkidearen tokia–.
Egin diren obrak
Aldatu berria den Zuzendaritza Batzordeak hainbat lan egin ditu azken urte honetan. Patxiku Ganboa orain arte idazkari izan denak azaldu digunez, «sukaldea aldatu eta berritu da, ateak aldatu eta alumuniozkoak paratu dira eta kudeaketa informatizatu egin da».
Barrikotea eta Bazkidearen Eguna
Usadioa mantenduz, otsail hondarrean edo martxo hasieran barrikotea antolatuko du Kasino elkarteak. Horrez gain, iaz zehaztutako erronka berreskuratzen ahalenginduko dira, Bazkideen Eguna antolatzen, hain zuzen. «Duela bi urte galdu zen ohitura hau, jendea apuntatzen ez zelako». adierazi digu Ganboak. «Obrak zirela eta, iaz ez zen egin. Aurten berreskuratu nahi da», erran du.
DATUA
255 BAZKIDE
inguru ditu gaur egun Kasino elkarteak.