Astelehenarekin tokatu da aurten San Anton Eguna, eta astez izateak jende gutxiago bildu arren, egun polita atera zen. Goizean meza izan zen ermitan eta herritarrak ez ezik, inguruko herrietatik ere etorri zen jendea. Ondotik, hamaiketakoa eskaini zen. Aipatzekoa da, bestalde, ermita txukun izatearen atzean Bittori Erasunen lana dagoela. Berak izan zuen hamaiketakoaren ardura ere eta eskertzekoa da.
Garai batean, mendi mutilak herrian izaten zirenean, baserritar giro haundia izaten zen San Anton egunean, eta aizkora eta ahari apustuak ere egiten ziren. Orain ez da halakorik, baina eguna ez zen goizeko mezarekin akitu. Arratsaldean, Aierrik herriko taldearen eskutik dantzaldia izan zen Estalpean, eta gaztetxoek ederki gozatu zuten. Ondotik, Udalak eskainitako txokolatada izan zen. Gauean ere somatu zen ez zela ohiko astelehena, ostatuetan jendea gelditu bai-tzen afaltzen.