Doneztebetik Endarlatsaraino proiektuari segida emateko Herrilan Sailarekin gelditu da Bertizko Partzuergo Turistikoa, azken xehetasunak argitzeko. Bertizko Partzuergoko Izaskun Goñik aipatu digunez, «proiektua prest dago, baina Alkaiagan errepidea nola gurutzatuko dugun zehaztea falta da». Hainbat aukera aztertu ondotik, ingeniariek bidea N-121A errepide azpitik pasatzea proposatu zuten, baina Iruñean ez zuten onartu eta pasarela bat diseinatzea eskatu zuten. Kantabrikoko Ur Konfederazioak, aldiz, ez du pasarela bat egitea uzten. Urtarrilaren 26an joan ziren berriro Bertizko ordezkariak Herrilan Departamentura, eta hirugarren aukera aztertzeko eskatu zieten. Uda baino lehen baimena lortzea espero dute.