Abenduaren 27tik urtarrilaren 2rako astean Correosek herrian gutunik ez zuela banatu eta kexu agertu da Udala eta urtarrilaren 14ko batzarrean erabaki zuenez, arrenkura hori eskutitz bidez igorri dio posta zerbitzua kudeatzen duen erakundeari. Hain zuzen, Correosekin harremanean jarri eta zerbitzuaren etena langilerik ez zutelakoz izan zela adierazi zion Udalari. «Gaur egun dagoen langabe kopuru handiarekin sinestezina dirudi aitzakia horrek», aipatu digu Paco Errandonea alkateak. Nonbait, orain arte Sunbillan aritu den postariari kontratua akitu eta urtarrilaren 3ra arte ez zitzaion langile berriari kontraturik egin. Urte hasieratik postari berria ari da lanean.
Abenduaren 27tik urtarrilaren 2ra arteko aste horretan korrespondentzia zerbitzu arrunta ez zen bete eta beraz, gutunik ez zen banatu etxeetan, bai, ordea, eguneroko prentsa. Hortaz, Udalak galdera hau egin dio Correos-i: «Garrantzitsuagoa al da edozein dendetan erosten al den eguneko prentsa banatzea urgentziako bertze edozein ziurtagiri edo medikuko hitzordua baino? Egiten ahal duten presioaren beldur al dira?». Paco Errandonea alkateak azaldu digunez, «medikuarekin hitzordua zuen baserritar batek data hori galdu egin du».
2009an hitzetik hortzera ibili zen buzoien kontzentrazioari dagokionez, oraindik ez dela deus egin erran digu Errandoneak. «Herritar batzuek buzoiak elkartu zituzten, baina oraindik etxez etxe banatzen dute. Ez dakigu noiz arte, Pablo Delgado Correosek zonaldean duen arduradunak adierazi zigunez, dekretuak baserri auzoetako buzoiak elkartzea eskatzen baitu. Hortxe dabiltza bere dekretuekin eta araudiarekin eta erabiltzaileok dena bete behar dugu bitartean, Correosek nahi duen guzia egiten du. Ibili eta buelta hor heldu dena pribatizazioa da», dio alkateak.