Hiru urteko debekuaren ondotik, berriz ere amuarrainak arrantzatzeko aukera

Nafarroako mendialdeko arrantzaleek bi berri batean jaso zituz­ten urtarrilaren 4an Begoña Sanzberro Nafa­rroa­ko Gobernuko Ingu­rumen kontseilariaren ahotik. Berri ona: hiru urt­eko debekuaren ondotik berriz ere arran­tza egin ahal izanen dela sasoi honetan. Berri txarra, arrantzale bakoi­tzak gehienez bortz egun izanen dituela arran­tza egiteko.

Horretaz gain, hiru urteko debekuaren eraginez, amuarrain kopurua bikoiztu egin dela jakinarazi zuten Gobernuko ordezkariek. 2007an Hektareako 1.635 amuarrain zenbatu zituzten eta 2010ean, Hektareako 3.347 amua­rrain. Hain zuzen, maila «normala» kontsi­deratzen da, kopuru hori 2.000 eta 4.000 amua­rrainen artean dagoenean. Aurten, maiatza eta ekainean 27.966 arran­tza-pase emanen dituzte Nafarroako mendialdeko erreketan arran­tza egiteko. Horietatik 9.724 Baztan-Bidasoalderako izanen dira. Maiatzaren 1etik ekainaren 30era arran­tzatu ahal izanen da, astearteetan izan ezik. Beraz, arrantzarako 52 egun izanen dira, baina arrantzale bakoitzak gehienez bortz baimen eskatzen ahal ditu telefonoz edo Internet bidez eta eguneko hiru amua­rrain baino gehiago ezin izanen ditu eraman. 20 zentimetro baino guttia­go edo 35 zentimetro baino gehiago dituzten amuarrainak errekara bueltatu beharko dira.

Izokin denboraldia

Izokin denboraldiari dagokionez, 2010ean erre­kan goiti joan diren izokinak kontuan hartuz (500 inguru), aurten 39 izokin arrantzatzeko baimena emanen da (iaz 20 izokinekin itxi zen denboraldia). Sasoia maiatzaren 1etik uztai­laren 17ra arte izanen da, edo bertzenaz, 39. izokina arran­tza­tze­ra­koan itxiko da.

Formakuntza Donezteben

Aurtengo bertze be­rrikuntza Doneztebeko kirol arrantza edo heriotz gabeko arrantza eskola izanen da. Doneztebeko Udalak eta Ingurumen Departamentuak sinatutako hi­tzarmenaren ondorioz, arrantza formakuntza eskola hau Doneztebe zeharkatzen duten hiru erreketan eginen da, Ezkurran, Ezpeluran eta biak elkartuta sortzen den Galbaraialden. Momentuan ez da bertze da­turik, baina denboraldia hurbiltzen denean jakinaraziko direla aipatu dute.

DATUA

3 AMUARRAIN

arrantzatu ahal izanen ditu bakoitzak eguneko. 20 zentimetro baino guttiago eta 35 baino ge­hiago dituztenak errekara bueltatu beharko dira.