Errege bezperako joare festaren ondotik, inauteriei begira jarriak gaude herritarrak, hori baita urteko beste hitzordu nagusietako bat Zubietan. Hilaren 30ean, igandearekin, eginen den puxka-biltzearekin emanen zaie hasiera eta asteazkenera arte, otsailak 2, iraunen dute.
Aipatzekoa da, garai batean San Anton egunarekin egiten zela inauteriak prestatzeko bilera, otorduak antolatzeko, adibidez. Orain, ordea, ardura hori Patxiku Mitxelenaren eskuetan dago. Bera eta bere laguntzaileak izaten dira inauterietako 14 otorduen arduradunak, inauterien aurreko eta ondoko larunbatetako afariak barne, urtarrilak 29 eta otsailak 5.
Urteekin badira aldatu diren beste kontu batzuk ere. Garai batean, inauteriak antolatzeko elkartean arau zorrotzagoak izaten ziren. Elkartean ezin izaten zuten ezkonduek sartu, ezta emakumezkoek ere. Orain, aldiz, badute aukera. Elkartean sartzeko gutxieneko adina 18-21 urtekoa izaten zen lehenago, baina orain 16 urtetan sartzen dira.
Halere, lehen edo orain, huts egiten ez ditugun ekitaldi horietakoak izan dira beti inauteriak. Eta seguru aurten ere ez dela umorerik faltako.
Errege bezpera
Arrakastatsua atera zen Errege Egunaren bezperako besta. Egunez, 14 urtetik beherako gaztetxoak herriko etxeetan zein baserrietan joareak jo eta jo ibili ziren, trukean jatekoa edo dirua hartuz. Gauez, berriz, helduen txanda izan zen. Hiru tokitan afaldu zuen jendeak, Herriko Ostatuan, estalpean eta Errandonean, eta afaldu ondotik, ohiko itzulia egin zuten joareak soinean. Aurtitz eta Iturenen barna ibili ondotik, herrira bueltatu eta 06:00 aldera arte aritu ziren joareak jotzen. 40 bat lagun atera ziren.