Nafarroako UEMAko udalek gutunak bidali dizkiote Nafarroako Gobernuko bi departamenturi, herritarrentzako inprimakiak euskaraz ere egon daitezen. Bi departamentuak Landa Garapen eta Ingurumenekoa eta Kultura eta Turismokoa dira, eta gutuna bidaltzeko arrazoia sail horien dozenaka inprimaki eta argitalpen euskaraz ez egotea da. UEMAk eta Hizkuntza Eskubideen Behatokiak bultzatu dituzte gutunak, eta euskaldunen aurkako hizkuntza urraketak ezabatzea du helburu. Gutunetan, Euskarari Buruzko Legea hartu dute hizpide. Izan ere, legeak eskualde euskaldunetako herritarrei administrazioekiko harremanetan euskara erabiltzeko eskubidea aitortzen die, eta hori ezin da uztartu inprimakiak eta argitalpenak gaztelania hutsez egotearekin. Gutunak Nafarroako UEMAko udalerri guztiek bidali dituzte, tartean, Arantza, Areso, Bera, Etxalar, Goizueta eta Leitzak.