Euskararen Legearen 24. urteurrenaren harira, agerraldia egin zuen ezker abertzaleak joan den hilabetean, ofizialtasunaren bidean hizkuntz politika berriaren beharra aldarrikatzeko. Han izan ziren Xanti Kiroga bozeramailea eta Leitza eta Berako alkateak, Xabier Zabalo eta Josu Iratzoki. 24 urteotan «nafar guztion hizkuntz eskubideak urratuak» izan direla salatu zuten, eta Nafarroako Gobernuari «lege honetan euskara zokoratzeko eta herritarrak baztertzeko bidea aurkitu duela» leporatu zion. Bertzeak bertze, zonifikazioaren bidez, herritarren hizkuntz eskubideak mailakatu eta ukatu direla ere gaineratu zuen. Ofizialtasuna eskatu zuen, baita belaunaldi berrien euskalduntasuna bermatzeko ere.
NaBaik, bere aldetik, Euskararen Legea berritzeko proposamena egin du Nafarroako Legebiltzarrean. Proposamen horrek gizartearen beharrei erantzunen diela adierazi dute, eta helburua Nafarroan euskara ofiziala izatea omen da. Euskararen erabilera indartzeko baliabideak eta administrazioaren egitekoa ere ageri dira, bertzeak bertze, aipatu proposamenean.