Jexuxmari Lasa gipuzkoarrak irabazi du II. Mailako Euskadiko Aizkora Txapelketa. Lehenengoz jantzi zuen txapela azaroaren 19an Donezteben, baina Oihan Larretxea beratarraren lana ere azpimarratzekoa izan zen, txapeldunorde gelditu baitzen eta horrenbertzez, biek lortu zuten heldu den denboraldian Euskadiko Maila Nagusian aritzeko txartela. Lasa txapeldunak minutu eta 14 segundoko aldea atera zion Larretxeari.
Ondoko sei aizkolariak aritu ziren lehian: Xabier Mindegia (Beintza Labaien, 26 urte), Oihan Larretxea (Bera, 20 urte), Jexuxmari Lasa (Legorreta, 36 urte), Manuel Kañamares (Arostegi, 46 urte), Ander Erasun (Aurtitz, 20 urte) eta Ugaitz Mugertza (Mutriku, 23 urte). Bakoitzak seina pago-enbor moztu zituen: bi kanaerdiko, bi 60 ontzako eta bi oinbiko.
Kanporaketako denborarik onena Mindegiak egina zuen (15:02), baina Donezteben hastapenetik hartu zuen probaren burua Lasak eta horrela segitu zuen azken aizkorakada eman arte. Azken egurrean biziki ahalegindu zen Larretxea Lasa gainditzen, baina aldea handi samarra zuen txapeldunak ordurako. Hala ere, Larretxeak bigarren postua lortu nahi izan zuen kosta ahala kosta, eta bai lortu ere. Beraz, heldu den sasoian lehenengoz ariko da Maila Nagusian Berako gaztea.
Sailkapena
1. J. Lasa: 23:17.
2. O. Larretxea: 24:31.
3. U. Mugertza: 25:52.
4. A. Erasun: 26:22.
5. X. Mindegia: 27:15.
6. M. Kañamares: 27:55.
LARRETXEAN FIN
Txapeldunarengandik minutu eta 14 segundora gelditu zen Oihan Larretxea finalean.