Eratsungo Alkote bordaren ondoan, 1951ean exekutatu ziren hiru makien arrastoak aurkitzeko egin diren azken saiakerek ez dute zalantzarik argitu. Helburu horretan aritu ziren azaroaren 20an, Aranzadi Zientzia Elkartekoak eta herritarrak, baina ez zuten ezer lortu.
Herritar batzuen argibideei segituz, 09:30 aldera hasi ziren lurra mugitzen, eta bi orduko lanen ondotik, arrastorik ageri ez zela-eta, hondeatzaile makinarekin ekin zioten. Halere, alferrik, ez baitzen zorterik izan eta 15:00 aldera, bildutako 15 bat lagunak Barranka ostatura joan ziren bazkaltzera.
Duela urte batzuk ere, Aranzadiko kideak inguru horretan ibili ziren, eta zenbait herritar ere elkarrizketatu zituzten. Gerorako utzi zuten kontua. Baina Jose Luis Martinez Barranco leitzarraren interesari esker eta fusilatutako senitartekoen elkartearen kolaborazioarekin, behar ziren baimenak eta Presidentzia Ministeriotik dirulaguntzak eskuratu ziren.
Emaitzik gabe zalantzak areagotu egin dira. Gainera, sortzez eratsundarra baina herritik kanpo bizi den batek baieztatu egin du makiak Latargi eremuan lurperatu zirela, baina gerora, herriko apaizak gorpuak lurretik atera eta hilerrira eraman zituela. Hildakoen oroimenez apaizak hileta elizkizunak egin nahi izan zituela dioenik ere bada, baina agintariek debekatu omen zioten.