Abenduan sartuak gauden honetan, kanpora begiratuz eguraldi txarra ikusten dugu, hotza, euria eta mendietan elurra. Horrekin ohartzen gara negua laister dugula, baina ate joka ditugunak Eguberriak dira. Eguberrietako oporrak hartu aitzinetik, eskolako neska-mutikoak ikuskizun, besta, musika eta algara izanen dute. Baina ez dira horrekin bakarrik geldituko, eskutitzak idatziz, Olentzero egunerako Eguberrietako kantak ikasten eta kantatuz hortxe ibiliko baitira.
Beste herrietan bezala, Aurtitzen eta Iturenen Olentzero etorri baino lehen gaztetxoak herriari buelta emanez ibiliko dira Eguberrietako abestiak kantatuz. Gainera, agian Iturenera Olentzerok bisita eginen du.
Urtezaharra eta errege bezpera
Urtea bapo-bapo afalduz akituko dugu eta 12 mahats janez hasi urte berria. Baina horren ondotik, Errege bezpera besta haundia izaten dugu, bai Iturenen eta Aurtitzen ere, afari baten bueltan biltzen baitira denak. Iturengoen kasuan, Ibintza Kultur Taldearen boletoen zozketa ere orduan eginen da. Gauerdia hurbiltzean, Ituren, Aurtitz eta Zubietan joare soinuak entzuten hasiko dira: gazte ala zahar, mutil ala neska, joare soinuak zabaltzen ariko dira lau haizetara.
Eguberriak horrelaxe pasako ditugu gure txoko honetan. Lerro hauen bidez, denei Eguberri zoriontsuak opa dizkizuegu eta Urteberri On! Ea ez dugun ikatzik oparien artean.