Azaroaren 20an jokatu zen Nafarroako Euskal Kantu Txapelketako azken saioa Elizondoko Lur dantzalekuan eta aurtengo edizioan parte hartu duten 22 lagunen artean nabarmendutakoak aritu ziren. Giro bikaina izan zen eta jendearen erantzuna ere ona izan zen, 400 bat lagun hurbildu ziren saioa ikustera. Berriki zendu den Jose Antonio Labordeta kantariari ere omenaldi eskaini zitzaion.
Sorkuntza-lana, eta era modernoan eta zaharrean kantatzeko dohainak izan ziren saritutako ezaugarrietako batzuk eta azken horretan, hain zuzen, bigarren saria Elizondoko Elisa Perotxenak eta Ziaurrizko Iñaki Gerendiainek lortu zuten Baldorba kantuarekin.
Sari bereziak
Bertzelako sari bereziak ere banatu ziren. Tartean, Berako Uxua Anduezak eta Alkozko Amaia Oiartzunek Interpretazio ederra eta aipamen berezia sorkuntzako lanagatik jaso zuten aipamena. Etxalarko Dantzadi taldeak ere saria hartu zuen, talde lanagatik eta interpretazio ederragatik. Irune eta Itsaso Elizagoien ahizpek eta David eta Iñigok osatzen dute Dantzadi taldea.
Euskal Herriko trikitilari gazteen txapeldun
Etxalarko Irune eta Itsaso Elizagoien ahizpek Euskal Herriko trikitilari gazteen txapelketa ere irabazi dute. Azaroaren 28an, Zaldibarren (Bizkaia) jokatu zen txapelketaren XIX. edizioa eta bikain aritu ziren, Euskal Herri osoko zortzi bikoteren artean nabarmenduz.
Bizkaiko Trikitixa, Porrusalda, Azkorgain fandangoa eta Arin-Arina jo zituzten. Etxalarko ahizpak lehendik ere Lesakako edo Malerrekako txapelak irabaziak badira ere, orain arteko garaipenik handiena lortu dute trikitixa eta panderoarekin.