Etortzear dagoen zubi honetan, Kultur Egunak antolatzen ditu Ibintza Kultur Taldea urtero. Baina aurtengoan hilabete osoan hainbat ekitaldi eginen ditu. Abenduaren 3an, erraterako, ilubarrean Herriko Etxeko Ganbaran talo-jatea izanen da, eta tripa ederki bete ondotik, mus txapelketa eginen da goizeko ordu ttikiak arte. Abenduaren 4an, berriz, haurren eguna izanen da: goizean haurrendako tailerrak eginen dira, eguerdian haurren bazkaria Ganbaran eta arratsaldean haurrentzako ikuskizuna izanen da. Ekitaldi hauek abendu hasieran izanen badira ere, aipatu bezala, hilabete osoan ekitaldi gehiago izanen dira, eta aurrerago aipatuko ditugu gainerako hitzorduak.
Boletoak
Hainbat ekitaldi antolatzen ditu urte osoan Ibintzak, eta horiek finantzatzeko diru iturri garrantzitsuak diren boletoak laster aterako dira eta herriko komertzio eta ostatuetan paratuko dira salgai. Bestalde, Kultur Taldetik deialdia luzatu diete herritarrei kide berriak behar dituztelako ideia berriak aitzinera eramateko.