Rakel Rico Berako argazkilariak eta EHNE sindikatuak elkarlanean osatutako Emakume baserritarren begirada erakusketa Doneztebeko Alhondiga gelan, liburutegi ondoan ikusgai izanen da azaroaren 19tik 29ra. Zehazki, astelehenetik ortziralera egonen da ikusgai, 17:00etatik 19:00etara, Alhondiga gelan, liburutegiaren ondoan. Dena dela, ortziraleko Feria Eguna aprobetxatuz, goizetik ere zabalik izan da erakusketa eta bertan eman dituzte azalpenak Rakel Rico argazkilariak eta EHNEko Mariado Iturraldek.
24 emakumezkoen 60 argazki
Emakume baserritarrei egindako 60 argazkirekin osatutakoa da erakusketa, eta emakume baserritarren lana jendeak ezagutu eta baloratzea, zerbitzu falta salatzea eta lehengo baserriko emakumeei omenaldia egitea dira erakusketaren helburuak. Argazkietan ageri diren 24 emakumeetatik aunitz eskualdekoak dira: Martina Ormart (Elizondo), Josefa Loiarte (Zubieta), Marian Aranibar (Bera), Maider Azkarate eta Igone Oteiza (Aniz), Lourdes Argain (Narbarte), Mariado Iturralde (Donamaria) eta Juana Mari Gortari (Ziga). Adin eta alor desberdinetakoak dira: esnetako edo haragitako behiak dituzte batzuek, ahuntzak edo oiloak bertzeek… Eta argazkiez gain, emakumeen esaldi batek laburbiltzen du bakoitzaren egunerokoa.