Urriaren 27an egin ziren Arcelor Mittal enpresako Legasa eta Lesakako lantegietan hauteskunde sindikalak eta bietan LAB sindikatua nagusitu zen. Lesakako Arcelor Mittalen 17 ordezkari aukeratu behar zituzten langileen batzorderako. Horietatik 6 LABekoak izanen dira, 5 ELAkoak, 4 UGTkoak eta Cuadros eta CCOOko bana. Legasako AMDS Processing lantegian, berriz, 9 ordezkari hautatu ziren eta LABek gehiengo osoa lortu du, 5 delegaturekin. ELAk 2 ordezkari lortu ditu eta UGTk eta Cuadrosek bana. Bertzetik, Arcelor Mittal enpresak Legasako lantegia guttinaka itxi eginen duela adierazi du, 2011ko ekainean erabat itxi arte. Hor egiten den lana eta ehun langile Lesakako lantegira eramanen dira eta horretarako obrak egiten ari dira Lesakan, Bidasoa Planaren barne. Lesakako margotze eta galbanizatu lerro berria, proba gisara urte bukaeran hasteko moduan egonen dela ere jakinarazi dute, «baina modu egokian, 2011ko lehen urte erdian hasiko da lanean». 30 milioi euroko inbertsioa eginen da horretarako.