Laster inauguratuko da haur eta gaztetxoentzat prestatu den ludoteka

Berandu gabe, egoitza berria izanen dute haur eta neska-mutiko kozkorrek horretarako egokitu den eskola zaharraren beheko solairuan. Eskola zaharra hutsik zegoela eta, ludoteka gisa erabiltzea erabaki zen bere garaian, eta horretarako dirulaguntza eskatu zuen Udalak; 5.000 euro inguru hartu zituen.
Lerro hauek idazterakoan ludoteka zabaltzeko azken ukituak ematen ari ziren: garbiketa lanak egin dira, altzariak ere ailegatu dira, Mankomunitateko langileek margotze lanak egin dituzte... Irudiak emititzeko proiektorea ere izanen da.
Orain arte, beheko solairuan egin diren gauzak, berriz, goiko solairuan eginen dira hemendik aurrera. Besteak beste, eskulan ikastaroak edo taldekako beste jarduerak. Horrez gain, Aierrik musika talde berriak ere goiko solairuko gela bat erabiliko du entsaioak egiteko.

Kudeaketa
Ludoketaren funtzionamendua oraindik erabaki dagoen kontua da. Udalak ez du ludotekaz arduratzeko norbait kontratatzeko dirurik, eta beraz, gurasoekin bilera eginen du nola kudeatu solasteko. Proposamenak jasoko ditu Udalak bilkura horietan. Inaugurazio eguna ere oraindik zehaztu gabea da.