Hutsik egin gabe, aurten ere urriko lehenbiziko larunbatean Euskararen Eguna eginen da. Egitarau konpletoa prestatu dute gazteek, ostiralean hasi eta larunbatean segitzeko.
Ostiral arratsaldean hasiko dira ekitaldiak. 19:00etan pintxo lehiaketa eginen da Errandonea ostatuan, eta toki berean baina 22:00etan, mus txapelketa jokatuko da.
Egun haundia larunbatean
Goizean, 10:00etatik aurrera, herriko artisauek euren produktuak aterako dituzte. Zurgin-lanak, oihalarekin egindakoak eta bestelako gaiak nola lantzen dituzten ikusteko aukera izanen da.
10:30ean trikitilari eta joaldunek herrian barna itzulia eginen dute giroa alaitzeko.
12:30ean emakumezkoen herri kirolak izanen dira eta 14:00etan herri bazkaria Joxe Agirre eta Sebastian Lizaso bertsolariekin. Herri bazkarirako menu hau aukeratu dute gazteek: hasteko patea, zainzuriak, urdaiazpikoa eta bakailao tortilla, ondotik, txuleta entsaladarekin eta postretarako sagar tarta eta izozkia. Horiez gain, kafea eta kopa ere bai.
Bazkalondoan, trikipoteoa eginen da bertsolariekin eta 17:30ean txokolatada eskainiko da. Beranduago, 20:00etatik 22:00etara, Garraxi taldearekin dantzaldia izanen da. Tartean, 20:30 aldera, urdaiazpiko eder bat zozketatuko da.
Rock musika gustuko dutenek, berriz, 23:00etatik aurrera, kontzertuak izanen dituzte Mugalariak eta Askatu taldeekin.Akitzean, 01:00 inguruan, Garraxi taldearen saioa hasiko da berriz.
Gisa guzietako ekitaldiekin heldu da Euskararen Eguna. Ea dena ongi ateratzen den.