Aurten zazpigarren urtez, Itturrondo elkarteak Udalaren laguntzarekin, besta antolatu du urriaren 9rako, Urriruko besta deitua.
Arratsaldean emanen zaie hasiera ekitaldiei. 17:00etatik aitzinera inguruko artisauek euren lanak erakusgai paratuko dituzte plazan. 18:00etatik aitzinera Zubietako Joaldunak karrikaz karrika ibiliko dira giroa animatzen. 19:00etan herri kirolek hartuko dute protagonismoa: harri-jasotzailea eta aizkolariak.
06:00etatik erretzen ari den aretzea afaltzeko
Jaime Mindegia goizean 06:00etan prestatzen hasitako afariaren txanda izanen da ondotik. 06:00ak geroztik erretzen dagoen aretzea dastatzeko aukera izanen da hurbiltzen direnentzat. Kanalean 200 kilo pisatzen dituen aretzea prestatuko da, eta 21:00etarako prest egon beharko du. Aurten, urtero bezala, karpa barruan izanen da, eta platera mahaian egonen da. Afarian, aretzeaz gain, salda, entsalada, fruta, gazta, irasagarra, eta edariak behar diren guztiak izanen dira, baita kafea eta kopak ere. Guztira 200 lagunendako afaria izanen da, muga kopuru horretan mugituko delakoz.
Afaltzeko orduan zozketa bat eginen da, Nafarroako eta nola ez, Labaiengo produktuekin. Eta Frantxixko akordeoilariak alaituko du gaua. Herritar gehienak ez ezik, inguruko herrietatik ere jende andana hurbilduko da Beintza-Labaienera egun horretan.
Afarirako txartelak Itturrondo elkartean, Herriko Ostatuetan eta Baleztena dendan egonen dira salgai. Erosteko azken eguna urriaren 3a, igande hau, izanen da.