Maiz izan dugu azken aldian bidegurutzearen gaia hizpide. Baina aldi honetan ere bada horren inguruko berri bat: bidegurutzean aurreikusia zegoen itxaroteko erdiko erraila egiteko asmoa baztertu egin du Nafarroako Gobernuko Herrilan Departamentuak. Herritarrek errepide nagusiaren bertze maila batean egitea nahi dute, azpiko aldetik edo gaineko aldetik, eta horri erantzuteko «teknikoki eta ekonomikoki bideragarria den alternatiba» bilatuko dutela jakinarazi du Laura Alba Gobernuko Herrilan kontseilariak.
Irail hasieran, Doneztebeko IAT zentroaren inaugurazioan egindako protestek eta Pako Errandonea alkateak eta Miguel Sanz Nafarroako Gobernuko presidenteak izandako solasaldiak ondorioa izan dutela dirudi. Orduan, presidenteak herritarren borondatearen kontrako proiekturik ez zela eginen aipatu omen zion alkateari. Erdiko karrila abudo samar egiteko modua izan arren, sarrera-irteerak bertze maila batean eraikitzea diru-baliabideen arabera eginen da. Alkatea lanak lehenbailehen egitearen alde dago, «baina segurtasun gehiago izanen badu, esperoan egoteko prest gaude. Baina beti erran dugu dirua gastatzen hastekotan, gauzak ongi egin eta betirako soluzio duin bat nahi dugula».
Urriaren 7ko mozketa zalantzan
Soluzio duin horren alde hurrengo errepide mozketa urriaren 7rako hitzartua dago, baina Iruñetik emandako azken erantzuna ikusiz, lerro hauek idazterakoan oraindik erabaki gabea zen egin ala ez.