Bertizko Partzuergo Turistikoak antolatuta, Bidasoko mendi bizikleta martxaren hirugarren edizioa eginen da irailaren 26an. Aurtengoa berezia izanen da, lehendabiziko aldiz Gipuzkoa eta Nafarroako bide berdeetan barna eginen delako, bere garaian, trenak egiten zuen bidea berreskuratuz. Behobian hasi eta Bertizen akituko da 50 kilometroko itzulia. Helduak Puntxasko gasolindegian abiatuko dira 10:00etan. Eta haurrak, berriz, Sunbillako ikuztegitik abiatuko dira 12:00etan. Hor paratuko da, hain zuzen, atseden hartzeko gunea.
Martxa hau Europako mugikortasunaren asteko programaren barne eginen da, eta Doneztebeko Bertiz BTT eta Berako Mandaniki enpresek lagundu dute, Nafarmendik jatekoa eta edatekoa eskainiko ditu, eta horrez gain, Nafarroako Gobernuak, Irungo Udalak, eta Gipuzkoako Foru Aldundiak eta Batzar Nagusiek diruz lagunduko dute.
Izen-ematea
Izena emateko e-postaz edo faxez egin behar da, www.consorciobertiz.org web orrian dagoen orria betez edo telefonoz eskatuz (948 592323).