Aizkorarako duen afizioa eta aizkoraren inguruan egin dituen hainbat lan tarteko, ezaguna da Antton Espelosin sunbildarra. Bera izan zen Ramon Latasa Basoko aizkolaria liburuaren edo Latasaren irudiekin osatutako DVDaren egilea. Sunbillan dagoen eskultura ere berak bideratu zuen.
Orain, berriz, Mikel Mindegiari egin nahi dio omenaldia, eta helburu horrekin aurkeztu dio Udalari Mindegiaren omenez eskultura bat egiteko ideia. 48.000 euroko aurrekontua edukiko luke eskultura hori egiteak, baina Udalak dirurik ez duela eta, gastua herriaren gain ez hartzea erabaki du. Aldiz, Mindegiak egin duen ibilbideak omenaldia merezi duelakoan dago Udala eta Espelosini dirua biltzen laguntzeko prest agertu da. Edozein entitatetan dirulaguntza eskatzeko ardura bere gain hartuko luke Udalak, baina herriarena den dirua erabili gabe.
Espelosinek, bere aldetik, dirua biltzeko hainbat bide zabaldu ditu. Alde batetik, Aizkora apustuak eta txapelketak 1949-2009 liburua kaleratu du eta biltzen duen dirua Mindegiaren oroigarria egiteko bideratu nahi du. Horrez gain, Nafarroako Kutxaren Zuk aukeratu, zuk erabaki ekimenean ere aurkeztu du proiektua, eta beraz, Nafarroako Kutxako edozein bezerok proiektu honen alde eginez gero, dirua Mindegiaren oroigarria egiteko bideratuko litzateke.
Dirua biltzen badu, eta gauza ongi badoa, orduan erabakiko da eskultura egin ala ez.