Herritarren arteko lehia izan zen irailaren 4an Galarretan, Kursaal Kasinoaren txapelketaren finalean. Koteto Ezkurra beteranoak eta Julen San Migel gazteak elkarren aurka jokatu zuten eta azkenean, 30-24 zaharrena nagusitu zen, bere bakarkako hamargarren txapela lortuz. Baina ez zion erraz utzi arerioak, eta San Migelek ere tanto on aunitz jokatu zituen. Jendeak ere ederki erantzun zuen, eta ia goraino bete zen frontoia: 1.000 ikusle inguru bildu ziren. 2005ean bederatzigarrena jantzi zuenetik, bortz urte eman ditu zenbaki borobil horren bila Kotetok. 1990ean debutatu zuen, 16 urte bertzerik ez zituenean, eta 1995ean jantzi zuen lehen txapela. Hurrengo lauak ere beretzat izan ziren. 2001 eta 2002an bertze bi lortu zituen eta 2004 eta 2005ean azkenak. 2007an azpitxapeldun izan zen Patxi Zeberioren kontra galdu ondotik, baina Migel Mari Urrutia saldiastarrak irabazi duen azken bi urtetan ez zuen finalean sartzerik lortu. Hamargarrena amari eskaini dio.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun