Hutsik egin gabe, aurten ere Joaldunen Eguna antolatu dute joaldunek eta Ibintza Kultur Taldeak elkarlanean. Larunbat honetan, irailak 18, eginen da eta goiz-goizetik hasiko dira joare doinuak.
Goizean Amezti auzora joanen dira joaldunak herriko trikitilariekin. Sotilenean eginen dute lehenengo geldialdia. Hortik aitzinera baserritarrek etxeko ateak zabal-zabalik ireki eta gosari ttikia eskainiko diete. Ameztiko baserri guztietan geldituz, azken geldialdia Altxuneko bordan eginen dute. Handik Lasaga auzora jaitsiko dira joareen soinuak, eta gero herrira.
Eguerdi aldera, joaldunak eta trikitilariak beraien buelta herrian eginez akituko dute itzulia.
Aizkora, bertsoak eta musika
13:30 aldera sekulako aizkora apustua izanen da plazan: Donato Larretxea eta Floren Nazabal aurrez-aurre ariko dira. Ondotik, Jexux Mari Irazu eta Jon Maiak bertso batzuk botako dituzte bazkaldu aitzinetik. Bazkaldu ondotik, berriz, bertsolarien saioaz aparte, Mikel Salaberriren musika doinuak izanen dira gaueko ordu ttikiak bitarte.
Bazkaltzeko txartelak Herriko Ostatuan eta harategian daude salgai.