Joan den larunbat ilunabar batean, bi sugegorri azaldu omen ziren plaza inguruan. Bizpahiru lagunek ikusi zituzten ostatu bazterrean. Ez jakin nondik nora agertu ziren, sugeak ez baitira hola eta hola karrikan agertzen. Jendea, badaezpada, urruti samarretik egondu zen begira, hozka gaiztoa izaten baitu sugegorriak.
Barcina eta Sanzberro
Abuztuaren 14an, jende handiak izanduak ditugu herrian. Labaiengo errege bidetik barrena agertu ziren diztargi handiko auto ilun dotoreetan: Yolanda Barcina Iruñeko alkate famatua eta Begoña Sanzberro andere txit baztandarra eta Nafarroako Landa Garapen eta Ingurumen kontseilaria. Laguntzaile mordoska ere bazituzten bizkar aldetik, zer gerta ere.
Batzuek diote Malerrekako eta Basaburuko herri koxkor hauei bisita jator bat egitera etorri zirela eguraldi ederra aprobetxatuz. Urrozen eta Labaienen izandu omen ziren honara ailegatu aurretik.
Beste batzuek diote, berriz, hurbil samar dauzkagun 2011ko hauteskundeen usainean etorri ote ziren, herriko etxeak bisitatu eta beren doktrina zabaltzera. Uzta jasotzeko, lehenbiziko erein egin behar omen da eta...