Jose Antonio Loiarte zubietarrak eta Raul Kastro urroztarrak hirugarren maila utzi eta bigarrenean aritzeko txartela lortu dute. Igandean jokatu zen Nafarroako III. Mailako Aizkora Txapelketako finala Arazurin, txukun aritu ziren zubietarra eta Kastro, eta lehendabiziko bi postuak eskuratuta lortu dute mailaz igotzea.
Uztailaren 8an Iruñean jokatutako kanporaketan sailkatu ziren lehen bortz aizkolariak aritu ziren finalean. Loiarte izan zen lanak akitzen lehena: 07:48ko denbora behar izan zuen 45 ontzako bi enbor eta bi kanaerdiko ebakitzeko. Raul Kastro urroztarra bigarren gelditu zen, 09:08ko denbora egin ondotik. Asier Pellejero aresoarra, berriz, hirugarren gelditu zen (09:32).