Iaz egin zen bezala, aurten ere uztailaren 31n, larunbatarekin, bazkaria antolatu dute herriko gazteek Leurtzako urtegietan. Baina, aitzinetik, egitaraua osatzeko, apustua ez bada ere, lehia ttiki bat izanen da herriko bi bikoteren artean.
Bikote bakoitzak hainbat enbor moztu beharko ditu aizkoraz, eta urtegi inguruan, zazpi kilometroko luzera duen itzulia bi aldiz egin beharko du.
Gosea egiteko lan ederra. Ondotik, seguraski, gehienek Beintza-Labaiengo bestak bertan direla aprobetxatuko dute, Foru Poliziak bidea trabatzen ez badu behinik behin.
Bisita gidatuak Leurtzan
Uda honetan ere, Leurtzako urtegietan bisita gidatuak eginen dira, Bertizko Partzuergoak Beintza-Labaien eta Urrozko Udalen laguntzarekin antolatuta. Guttieneko taldea osatuz gero, aste osoan goizez edo arratsaldez, ordu erdiko bisitak eginen dira. Horrez gain, aipatu, beheitiko urtegiaren inguruan elbarrituendako bi kilometroko ibilbidea egokitua dagoela eta Nafarroako Gobernuak aurten ez duela sua egitea debekatu. Beraz, hango parrillak erabiltzeko moduan daude. Dena den, piragua, kanoa eta ur ontzien erabilera debekatua dago, baina koltxonetak, flotadoreak eta antzekoak baimenduak daude.