Etxalarko Mendi Taldeak uztailaren 4an eman zion denboraldi honi akabera. Abelu-Arantza-San Juan Xar ibilbidea egin zuten eta eguerdian Gorospileko etxolan bazkaria. Bildutakoek giro ederrean eman zioten bukaera denboraldiari. Sasoi honetan 20 ibilaldi inguru egin dira eta jendetsuenak San Antonekoa, Sunbillako inauterietakoa eta Larungo igoera izan dira.
Hurrengo ikasturteari begira, urtarrilean hasteko asmoa dute, uda eta ehiza denboraldia pasa ondotik. Periko Berrueta eta Joxe Mari Arburua arduradunek erran dutenez, inguruko mendien artean, Ekaitza, Hirubela-Kasko eta Azkua-Aixkolegi zeharkatzea dituzte gustukoenak. Altxatak antolatzen dituen ibilaldi hauetara jende gehiego animatzea nahiko lukete.