9 urterekin hasi zen Iñaki Diegez akordeoiarekin, eta geroztik, diskak atera, talde ezagunetan parte hartu eta etxean zein nazioartean sari andana lortu ditu. Duela urte batzuk, Doneztebera ailegatu zen, eta azken aldian, Agorreta Musika Eskolako akordeoi irakaslea da. Mendi Abesbatzaren sortzaileetako bat ere izan zen, baita bortz urtez zuzendaria ere. Eta orain, eszendentzia hartuta, 2009ko apiriletik, AEB eta Kanadan dabil, Cirque du Soleilen oVo ikuskizunean akordeoiaren doinua sartuz. 2011eko ekainera arte ibiliko da kanpoan.
Lan aberasgarria
«Bigarren aldiz deitu zidaten Montrealetik, Cirque du Soleilen proiektu berri batean parte hartzeko. Kasu honetan, nire lana akordeoiarekin doinua ikuskizunean sartzea zen. Lan interesgarria iruditu zitzaidan, musika horrek, nahiz eta ni hemen ez egon, urte askoz jarraituko baitu, eta nolabait nire jotzeko era hor
geldituko baita»
Zein ibilbide egin duzu akordeoiarekin?
Profesionalki lehen urratsak akordeoi klasikoarekin egin nituen. Hiru diska atera nituen, eta kontzertu asko eman nituen, bai inguruan, eta bai Europan ere. Urte batzuk pasatu eta gustorago sentitzen nintzen beste musika mota batzuk eginez: Jazz, Folk, Rock... Beraz, klasikoa alde batera utzi eta ildo honi jarraituz beste musikari batzuekin jotzeko aukera izan nuen, eta hori dela eta, herriz herri asko mugitzen hasi nintzen. Honek jende asko ezagutzeko aukera eman zidan, eta bide batez, oso musikari ezagun eta onekin egoteko aukera. Nire hobbytik nire lanbidea egiteko aukera izan dut.
Nola ailegatu zinen Doneztebera?
Ikasketak amaitu eta urte gutxira, Doneztebeko akordeoi irakasle lanpostua atera zuten, eta oposaketak gainditu ondoren, lanpostua lortu nuen. Hasierako urte haietan lan ikaragarria egin genuen irakasle ginenok eta garai hartako gurasoek. Guztiok, Udalaren babesarekin, eskola ona eraikitzea lortu genuen. Harro sentitzen naiz lan horretan parte hartu izanaz.
Nolatan sortu zitzaizun Cirque de Soleilekin AEB eta Kanadara joateko aukera?
Akordeoiarekin niretzako berriak diren bideak jarraitu nahian nabil beti. Hasiera batean, ordezkapen bat egiteko deitu zidaten, eta hori egin ondoren, etxera bueltatu nintzen esperientzia amaitutzat emanez. Bi hilabetez Euskal Herrian egon nintzen, eta Igor Telletxearekin, Pantxoa ta Peioren diskaren produkzioa egin, eta zenbait kontzertu eman nituen. Bigarren aldiz deitu zidaten Montrealetik (Kanada), Cirque du Soleilen proiektu berri batean parte hartzeko. Kasu honetan, nire lana akordeoiaren doinua ikuskizunean sartzea zen. Lan interesgarria iruditu zitzaidan, musika horrek, nahiz eta ni hemen ez egon, urte askoz jarraituko baitu, eta nolabait nire jotzeko era hor geldituko baita. Dena azkar gertatu zen eta ia agur esateko denborarik gabe bueltatu nintzen Kanadara.
Zer moduz egokitu zarete zu eta zure familia bizimodu berrira?
Bigarren aldi honetan, bi urterako proiektua zenez, familiarekin etortzea erabaki genuen. Oso gustura dabiltza, esperientzia oso ona da, bai tokiak ezagutzeko eta bai ingeles pixka bat ikasteko.
Nolakoa izaten da zure lana?
Hasierako hilabetean, Montrealen ikuskizuna montatzen egon ninen. Niri akordeoi musika zatiak egokitzea tokatu zitzaidan. Gaur egun, astean 9-10 show egiten ditugu asteartetik igandera eta astero 25.000 lagun etortzen dira.
Turismoa egiteko astia izaten al duzue?
Zirkoa herri batetik bestera mugitzen den bitartean, astebeteko atsedenaldia izaten dugu. Etenaldi horiek aprobetxatzen ditugu turismoa egiteko, astez ez baitugu denbora askorik. Martxoan, adibidez, etenaldi bat aprobetxatuz, Pantxoa ta Peiorekin Kalifornian pare bat kontzertu egiteko aukera izan nuen. Chinoko eta San Frantziskoko Euskal Etxeetan euskaldun asko ezagutu nituen. Hauetako asko Bidasoaldekoak, eta Doneztebeko ikasleen familiakoak ere aurkitu nituen, baita akordeoilariak ere!
Bueltatzen zarenerako, ba al duzu proiekturik?
Crossing Time diska orain dela hiru urte egin nuen, eta horrekin oso gustura ibili nintzen kontzertuak emanez. Bueltan, diska berri bat ateratzea gustatuko litzaidake.